Զրոյց-դասախօսութիւններ՝ ծնողների համար

Թ. Հ. Թ. Կրթական խորհուրդը ապրիլի 28-ից մինչեւ մայիսի 21-ը կազմակերպեց դաստիարակչական մի շարք կարեւոր նիւթերի զրոյց-դասախօսութիւններ՝ ծնողների համար: Դասախօսութիւնները կայացան «Սուքերեան», «Նայիրի» եւ «Շանթ» դպրոցի սրահներում՝ հետեւեալ նիւթերի վերաբերեալ. * Մղումի եւ ինքնավստահութեան առաջացում * Քննութիւն սովորելու դժւարութիւններ եւ ծնողի դերը * Հասարակական հմտութիւններ * Մոլութիւն Մասնագէտ դասախօսներն էին հերթականութեամբ՝ տկն. Արսինէ Մարտիրոսեան, պրն. Հրայր Դանիէլեան, տկն. Կարինէ Թահմազեան եւ օր. Մարիէտ Ղազարեան: Ստորեւ Ձեզ ենք ներկայացնում յարգարժան դասախօսների կենսագրական տւեալները եւ տեսակէտները: Արսինէ Մարտիրոսեան Ծնւել է 1956 թւականին՝ Աբադանում: Աւարտել է Թեհրանի «Փարս» բարձրագոյն ուսումնարանի (ներկայում՝ «Ալլամէ Թաբաթաբայի») հոգեբանութեան ճիւղը: 1987-2003 թւականներին հիմնել եւ տնօրինել է «Արեւ» մանկամսուր-մանկապարտէզ-նախակրթարանը: «Իրանի մանկական գրականութեան պատմութեան» 10-հատորանոց գրքերի կազմի մէջ աշխատել է եւ կազմել Հայկական մանկական գրականութեան ուսումնասիրութեան բաժինը՝ պատմութեան ընթացքում: Որպէս մասնագէտ մանկավարժ՝ համագործակցել է Իրանի տարբեր հասարակական կազմակերպութիւնների, նաեւ՝ Թ. Հ. Թ. Կրթական խորհրդի հետ, որը շարունակւում է մինչ այսօր: Հրայր Դանիէլեան Ծննդեան թւական՝ 1965 թ.: Սովորել է Թեհրանի համալսարանի լիսանսի եւ գերլիսանսի մակարդակում կլինիկական հոգեբանութիւն ճիւղում: Ըստ Հրայր Դանիէլեանի՝ «Հոգեբանութիւնը Իրանում նոր ճիւղ է եւ ճիշտ չի ներկայացւել. այդ պատճառով՝ հայ ծնողները ճիշտ պատկերացում չունեն, թէ ինչ օգնութիւններ կարող են ստանալ: Ուստի՝ ընդհանրապէս կամ չեն դիմում, կամ եթէ դիմում են, չգիտեն՝ ինչ սպասելիք կարող են ունենալ: «Երբ մի ծնող դիմում է, անկախ նրանից, թէ նրա երեխան որեւէ խնդիր ունի թէ ոչ՝ երկու պարագայում եւս աշխատանքների մեծ մասը, որ հոգեբանը պիտի կատարի, ծնողների հետ է: Ծնողները այդ տպաւորութեամբ չեն դիմում եւ սպասում են, որ հոգեբանը իրենց պահանջները կարճ ժամանակում բաւարարի. դժւարութիւնը սկսւում է եւ դիմումը դադարում է: Այնինչ, որպէս սկզբնական քայլ՝ հարկաւոր է տարբեր թեմաներով շարունակաբար հանդիպումներ ունենալ ծնողների հետ, մասնաւորաբար՝ դպրոցներում, ու նաեւ դրա շարունակութեամբ՝ երեխաների հետ»: Մարիէտ Ղազարեան Ծնւել է 1966 թւականին՝ Թեհրանում: Տարրական եւ միջնակարգ կրթութիւնը ստացել է «Նուրաֆշան» եւ «Մարի Մանուկեան» դպրոցներում: Միջնակարգ դպրոցն աւարտելուց անմիջապէս յետոյ՝ ընդունւել է համալսարան եւ ուսանել կլինիկական հոգեբանութեան ճիւղը՝ մինչեւ գերլիսանսի աստիճան: Իր մասնագիտութեան գծով կուրսեր է անցկացրել Իրանում եւ Եւրոպայում: Ուսանողական շրջանից սկսել է կլինիկական աշխատանքն ու կատարել մի շարք ուսումնասիրութիւններ: 1995 թւականից սկսած՝ պաշտօնավարում է Բարեկեցութեան (Բեհզիսթի) կազմակերպութեան մէջ, սկզբում հոգեբանական, ապա՝ թմրամոլութեան դէմ պայքարի բաժնում եւ այդ մարզում մի շարք նախագծերի հեղինակ է: Հեղինակն է Թեհրանի Պետական համալսարանի հեռախօսային հոգեբանական ծառայութեան: Զանազան դասախօսութիւններ է ունեցել Իրանի դպրոցներում, նաեւ դասաւանդել է մասնագիտական կուրսերում: Ունի մասնագիտական ուսումնասիրութիւններ եւ հրատարակութիւններ: Ուսանողական շրջանից սկսած՝ անդամակցում է Հայ համալսարանականների ընդհ. միութեան: Մասնակցել է միութեան տարբեր աշխատանքներին՝ աշակերտական նկարչական ցուցահանդէսների կազմակերպում, մի շարք հոգեբանական աշխատանքներ՝ երեխաների համար եւ մասնագիտական դասախօսութիւններ: Վերջին տարիներում դասախօսել է հայոց դպրոցներում՝ Կրթական խորհրդի հրաւէրով, որոնցից վերջիններն են թմրամոլութեան մասին դասախօսութիւններ՝ ուղեցոյց օղակի աշակերտների ծնողների համար: Կարինէ Թահմազեան Բարձրագոյն կրթութիւնը կլինիկական հոգեբանութեան ճիւղում ստացել է հետեւեալ համալսարաններում՝ «Ալզահրա» (լիսանս), Իրանի Բժշկագիտական համալսարան (գերլիսանս) եւ «Օլումէ բեհզիսթի վա թաւանբախշի» (դոկտորա): Դասաւանդել է հետեւեալ համալսարաններում՝ «Շահիդ Բեհեշթի», Թեհրանի համալսարան, «Օլումէ բեհզիսթի վա թաւանբախշի» եւ «Էլմօֆարհանգ»: Անդամակցում է «Շահիդ Բեհեշթի» ու «Օլումէ բեհզիսթի վա թաւանբախշի» համալսարանների Գիտական խորհուրդներին եւ գիտութեան, հետազօտութեան ու տեխնոլոգիայի նախարարութեան կից գործող Ուսանողուհիների հոգեկան-հասարակական վնասւածքների կանխարգելման մասնագիտական կոմիտէին: Հեղինակ է մի շարք ուսումնասիրութիւնների եւ նախագծերի: Մի շարք կենտրոններում կատարել է խորհրդատւական եւ հոգեբուժական աշխատանքներ: