Նոր Ջուղայի Կիրակնօրեայ դպրոցի 2008-2009 տարեշրջանի փակման հանդէսը
ՏԱՌԱՉԱՓ:
Նոր Ջուղայի Կիրակնօրեայ դպրոցը վերականգնւեց 2002 թ. եւ փայլուն վերելք ապրեց թեմում։
Նոր Ջուղայի Հայաստանեայց Առաքելական Սուրբ Եկեղեցու Կիրակնօրեայ դպրոցի 2008-2009 տարեշրջանի փակման հանդէսը, հովանաւորութեամբ եւ ներկայութեամբ թեմիս առաջնորդ Տ. Բաբգէն եպս. Չարեանի, տեղի ունեցաւ երեքշաբթի, յունիսի 23-ին, «Արարատ» միութեան սրահում։ Ծրագրին ներկայ էին նաեւ՝ քահանայից դասը, ազգային մարմինների ներկայացուցիչները եւ ծնողները։Դպրոցի տեսչուհի տկն. Դեզիրէ Մկրտչեանը իր բացման խօսքում նշեց. «Մեծի Տանն Կիլիկիոյ Վեհափառ Հայրապետ Ն.Ս.Օ.Տ.Տ. Արամ Ա կաթողիկոսը իր հայրապետական պատգամով Հայ ընտանիքի տարի հռչակեց 2004 թւականը։ Վեհափառ Հայրապետի պատգամով մի նոր հորիզոն բացւեց մեր ժողովրդի դիմաց՝ լուսարձակի տակ բերելով այն հիմն ու պատւանդանը՝ հայ ընտանիքը, որի վրայ կանգնած է մեր ազգը՝ իր մայրենի եկեղեցով ու ամէն տեսակի մեծ թէ փոքր կառոյցներով։ Վեհափառ Հայրապետը իր պատգամի մէջ այսպէս է ասում. «Պատմութեան պայմանների հետեւանքով՝ մի շարք եկեղեցիներ, յատկապէս՝ արեւմտեան հասարակութեան պատկանող, կորցրեցին ընտանիքի իւրայատուկ տեղը՝ քրիստոնէական կեանքում։
Պատիւ մեր ժողովրդին, որ կարողացաւ հակառակ իր կեանքի դժնդակ պայմաններին՝ անաղարտ պահել հայ ընտանիքի սրբութիւնն ու անվթար՝ նրա նւիրական դերը։ Ընտանիք-եկեղեցի յարաբերութիւնը եղաւ անմիջական ու կենդանի։ Ընտանիք ու եկեղեցի դարձան միմեանց ամբողջացնող ու զօրացնող կառոյցներ։ Մեր ազգի կարեւորագոյն կառոյցներից մէկը հանդիսացաւ Հայոց Առաքելական Եկեղեցու Կիրակնօրեայ դպրոցը։ Այն եկաւ ամբողջացնելու քրիստոնէական դաստիարակութեան բացը՝ հայ ընտանիքում։ Հայ մանուկը գտաւ իր տարիքին համապատասխան մի վայր, որը հետաքրքրաշարժ ու արդիական միջոցներով նրան ուղղում էր դէպի Աստւած»։
Նոր Ջուղայի Կիրակնօրեայ դպրոցը վերականգնւեց 2002 թ. եւ փայլուն վերելք ապրեց թեմում։ Շնորհիւ Սրբազան Հօր, Կրօնական խորհրդի եւ նւիրւած ուսուցիչների՝ այն հասաւ գեղեցիկ բարձունքների»։
Բացման խօսքից յետոյ աշակերտները հանդէս եկան շարականների եւ հոգեւոր երգերի երգեցողութեամբ, արտասանեցին աղօթքներ եւ սաղմոսներ, ապա ծրագրի երկրորդ բաժնում թատրոնի միջոցով ներկայացրին Հին կտակարանից՝ Աբրահամ նահապետի եւ Յովնան մարգարէի կեանքը, իսկ Նոր կտակարանից՝ Յիսուսի փորձութիւնը՝ անապատում, մինչեւ վերջ ներող սէրը եւ հարուստի ու աղքատ Ղազարոսի առակները։ Սրբազան Հայրը իր փակման խօսքում գնահատեց սաներին եւ ծնողներին, որ իրենց երեխաներին վստահել են Կիրակնօրեայ դպրոց, ու յատկապէս՝ տեսչութեան եւ ուսուցչական կազմին, որոնք սիրայօժար աշխատեցին եւ սաներին կրթեցին կրօնի եւ հաւատի անհրաժեշտ գիտելիքներով, սերտացրին նրանց յարաբերութիւնը՝ եկեղեցու հետ՝ նրանց սովորեցնելով Հայ Եկեղեցու «Հաւատամք»-ը, շարականները եւ աստւածաշնչական պատմութիւնները։
Վերջում սաները Սրբազան Հօր, Պատգամաւորական ժողովի եւ Կրօնական խորհրդի ատենապետերի ձեռամբ ստացան իրենց վկայագրերը եւ յուշանւէրները։ Յատկանշական է, որ երկու տարի առաջ, շնորհիւ Սրբազան Հօր, Պատգամաւորական ժողովի եւ Կրօնական խորհրդի հետեւողական ջանքերի, վերանորոգւեց մի շէնք, որը ամբողջութեամբ տրամադրւեց Կիրակնօրեայ դպրոցին, ուր շաբաթական երկու օր դասապահերի ընթացքում մանկապարտէզ, նախակրթարան, տարրական, ուղեցոյց եւ միջնակարգ բաժինների աշակերտ-ուհիները ստացան կրօնական գիտելիքներ՝ Կիրակնօրեայ դպրոցի գունազարդ դասագրքերի միջոցով, ընթերցեցին եւ ծանօթացան Աստւածաշունչ մատեանի օգտագործմանը, Հայ Եկեղեցու պատմութեանը, կառոյցին, սպասքներին եւ տօներին, երգեցին շարականներ եւ հոգեւոր երգեր, պատրաստեցին իրենց սերտած նիւթին համապատասխան ձեռքի աշխատանքներ։ Այս տարի Կիրակնօրեայ դպրոցը աշխատեց հետեւեալ կազմով. - Տեսչուհի՝ տկն. Դեզիրէ Մկրտչեան - Դասաւանդութեան պատասխանատուներ՝ տկն. Դեզիրէ Մկրտչեան եւ Թովմա սրկ Գալստանեան - Ձեռքի աշխատանքի պատասխանատուներ՝ տկն. Լիդա Յարութիւնեան, օր. Ադրինէ Օհանեան եւ Ալվարդ Զարգարեան - Երաժշտութեան պատասխանատու՝ օր. Սարինէ Յարութիւնեան։
ՆՈՐ ՋՈՒՂԱՅԻ ԿԻՐԱԿՆՕՐԵԱՅ ԴՊՐՈՑԻ ՏԵՍՉՈՒԹԻՒՆ
Ուղարկել ընկերոջը
Տպելու տարբերակ
Plain textՔւէարկութիւն: Էջմիածի՞ն թէ՞ Անթիլիաս
Նկատի ունենալով, որ այսօր մենք ունենք անկախ երկիր, Ձեր կարծիքով Իրանահայ եկեղեցական երեք թեմերը պիտի՞ վերամիաւորւեն Էջմիածնի մայր աթոռին, թէ՞ շարունակեն մնալ Կիլիկիոյ կաթողոկոսութեան հովանու ներքոյ:
Գնահատէք այս թեման
Պատգամներ (0 posted):
Գրանցէք ձեր պատգամը