Ամսական տօնական երեկոյթ՝ Հ. Մ. «Արարատ» կազմակերպութեան յարկի տակ

Հինգշաբթի, յունւարի 14-ի երեկոյեան, Հ. Մ. «Արարատ» կազմակերպութեան Երէցների միութեան նախաձեռնութեամբ, մարզաւանի «Վաչիկ Ղարաբէգեան» սրահում տեղի ունեցաւ միութեան ամսական հանդիպումը: Այս անգամ ընդհանուր հաւաքը տարբերւում էր միւսներից այն բանով, որ թէ՛ բովանդակութեան, եւ թէ՛ ձեւի մէջ աւելի շատ տօնական էր ու խրախճանքի բնոյթ էր կրում: Դա յունւարի ամսական ուրախ ընթրիք-երեկոն էր, որը նւիրւած էր նաեւ Ամանորեան ու Ս. Ծննդեան տօներին, նոյնպէս՝ ինչպէս կատարւում է Ս. Յարութեան տօնին զուգադիպող ամսադարձին: Ու տարբերութիւնը նրանում էր, որ այս երկու տաղաւար կոչւող տօներին մատուցւում են նաեւ տօնական աւանդական ուտեստներ, ինչպէս՝ քուքու, փլաւ եւ այլն: Հանդիպման սկզբում կազմակերպութեան եւ Երէցների միութեան անունից միութեան նախագահ Յարութ Նազարեանը ողջոյնի ու շնորհաւորական խօսք ասելով՝ նաեւ ասաց. «2010 թւականը դիմաւորեցինք այն յոյսով ու խորհրդով, որ Նոր տարին մեզ համար լինի բարօրութեան, առողջութեան եւ ազգային յաջողութիւնների եւ ուրախութիւնների ու ընդմիշտ տօնակատարութիւնների տարի»: 
Նա աւելացրեց. «2009 թւականին, անցեալ տարում՝ որպէս միութենականներ՝ միասնական կամքով ու ջանքերով դիրքորոշւեցինք, ծրագրեցինք եւ աշխատեցինք մեր կազմակերպութեան բարօրութեան եւ զարգացման ի սպաս եւ հաւատում ու խոստանում ենք, որ 2010 թւականին, նոր տարւայ ընթացքում եւս, Բարձրեալն Աստծոյ կամքով կը շարունակենք անցեալ տարւայ երթը՝ առաւել համընդհանուր եւ միասնական կեցւածքով, զերծ մնալով անհատական-անձնական տրամադրութիւններից, նոր յաջողութիւններ ու նւաճումներ ձեռք բերելու հեռանկարով»: Յ. Նազարեանի շնորհաւորական ու ողջոյնի արտայայտութիւններից յետոյ՝ ներկաները, որոնց մէջ էին նաեւ կազմակերպութեան պաշտօնեաները, շարունակեցին իրենց ուրախ խրախճանքը:Իսկ վերջում, յիշելով կազմակերպութեան այն անդամներին, որոնք ծնւել են յունւար ամսւայ ընթացքում, նրանց ներկայութեամբ հատւեց տարեդարձի տորթը եւ ներկաները շնորհաւորանքներ մաղթեցին բոլոր նրանց, որոնց տարեդարձի առթիւ հատւեց տորթը: