Իսլ. խորհրդարանում կրօնական փոքրամասնութիւններին ներկայացնող պատգամաւորները՝ «Ալիք»-ում

Դեռեւս շաբաթներ առաջ Իսլ. խորհրդարանում կրօնական փոքրամասնութիւնների պատգամաւորները ցանկութիւն էին յայտնել «Ալիք» այցելելու՝ մօտկից ծանօթանալու հրատարակչութեանը, մամուլի կառոյցին, առօրեայ աշխատանքներին եւ գործելաոճին: Եւ ինչու չէ, նրանց մշակութային եւ լրատւական ոլորտներում հնարաւոր սպասարկման: «Ալիք»-ի տնօրէնութեան եւ խմբագրութեան հետ համադրմամբ՝ հինգշաբթի, փետրւարի 4-ին իրանահայ պատգամաւորներ՝ ճրտգ. Գէորգ Վարդանեանի եւ Ռոբերտ Բեգլարեանի ընկերակցութեամբ խմբագրութեան յարկի տակ հիւրընկալւեցին՝ Իրանի զրադաշտականների պատգամաւոր Էսֆանդիար Էխթիարին, նրա օգնական Բամեսին, հրեաների պատգամաւոր Սիամաք Մորսեդեղը: Հրատապ գործի պատճառով՝ նրանց չէր կարողացել միանալ ասորիների պատգամաւոր Իւնաթան Բեթքոլիան: Մտերմիկ մթնոլորտում տնօրէնի եւ խմբագրի հետ հանդիպումից յետոյ՝ նրանք եղան թերթիս աշխատանքային տարբեր բաժիններում, մօտկից ծանօթացան աշխատանքային համակարգին: Պրն. Բեգլարեանը եւ պրն. Վարդանեանը այցից դուրս մեզ հետ հարցազրոյցի ժամանակ անդրադարձան այս օրերին Իսլ. խորհրդարանում օրակարգային թեմաներին, որոնցից ամենաառաջնայինը տարեկան բիւջէի քննարկումն է, որտեղ, բնականաբար, քննարկւում է փոքրամասնութիւններին յատկացւելիք բիւջէի բաժնեչափը: Նախկինից նաեւ օրակարգ են բերւել Քրէական օրէնսգրքի 881-րդ յօդւածի բարեփոխման նախագիծը եւ մեզ համար ամենակարեւոր հարցերին մօտալուտ անդրադարձը՝ տրանսպորտի նախարարը մօտ ժամանակներս պէտք է ներկայանայ խորհրդարան եւ պատասխանի պատգամաւորների Թեհրան-Երեւան աւիավթարին առնչւող հարցերին, որոնք դէպքին յաջորդող ամիսներում հէնց նոյն օրէնսդիր մարմնում բարձրացրել էին պատգամաւորները: Նաեւ քննարկւելու են մեր կրթական համակարգին յուզող հարցեր: Այս ամբողջի մասին ընթերցողը կարող է ծանօթանալ իրանահայ պատգամաւորների հետ մեր հարցազրոյցի ընդմիջից, որը շուտով կը ներկայացնենք թերթիս էջերում: