Իսլ. յեղափոխութեան յաղթանակի 31-ամեակի հանդիսութիւն՝ «Նայիրի» սրահում

Թ. Հ. Թեմական խորհրդի կողմից կեանքի կոչւած Իսլ. յեղափոխութեան յաղթանակի 31-րդ տարեդարձը նշող յանձնախմբի նախաձեռնած կենտրոնական ձեռնարկը տեղի ունեցաւ երէկ երեկոյեան՝ Հ. Մ. «Սիփան» միութեան «Նայիրի» սրահում, հովանաւորութեամբ Թեհրանի հայոց թեմի առաջնորդ Տ. Սեպուհ արք. Սարգսեանի: Միջոցառմանը ներկայ էին՝ Իսլ. խորհրդարանի հայ զոյգ պատգամաւորները, քահանայ հայրեր, Թ. Հ. Թ. Պատգամաւորական ժողովի, Թեմական խորհրդի, ազգ. մարմինների եւ միութիւնների ներկայացուցիչներ, Սասուն քաղաքամասի քաղաքապետարանի ու դպրոցների պատասխանատուներ եւ հասարակութիւն: Ծրագիրն սկսւեց Իրանի Իսլ. Հանրապետութեան պետական հիմնով եւ Տէրունական աղօթքով, որից յետոյ Կազմակերպիչ յանձնախմբի կողմից բացման խօսքն ասաց եւ ապա ծրագիրը վարեց Արտոյտ Զոհրաբեանը: Օրւայ առթիւ բանախօսեց Իսլ. խորհրդարանի հարաւային իրանահայութեան պատգամաւոր Ռոբերտ Բեգլարեանը: Նա նախ շնորհաւորեց Իսլ. յեղափոխութեան 31-րդ տարեդարձը, մէջբերումներ կատարեց օտարազգի լրագրող Միշէլ Ֆոկոյի արտայայտութիւններից՝ Իսլ. յեղափոխութեան մասին, ապա իր խօսքը կենտրոնացրեց կրօնի դերի վրայ՝ Իսլ. յեղափոխութեան յաղթանակի մէջ եւ հայոց պատմութեան ողջ ընթացքում: Ծրագրի գեղարւեստական բաժնում Արտոյտ Զոհրաբեանը պարսկերէն լեզւով ասմունքեց Վահան Տէրեանի գրչին պատկանող օրւան համապատասխան երկու բանաստեղծութիւններ, որոնց թարգմանութիւնը կատարել է Ահմադ Նուրիզադէն, Հ. Ուս. «Չհարմահալ» միութեան յարկի տակ գործող «Ակունք» պարախմբի սաները, Կարինէ Մանուչարեանի ղեկավարութեամբ, հանդէս եկան երկու պարերով եւ «Հայ կին» միութեան կից «Անահիտ» միութեան «Զւարթնոց» երգչախումբը, Էդիկ Թամրազեանի ղեկավարութեամբ, ելոյթ ունեցաւ հայերէն եւ պարսկերէն երգերով: Առաջին անգամը լինելով՝ կատարւեց Էդիկ Թամրազեանի հեղինակած «Խորշիդէ խաւարան» երգը: Ծրագրի ընթացքում պաստառի վրայ ցուցադրում էին դրւագներ՝ Իսլ. յեղափոխութեան օրերից եւ հատւածներ՝ նոյն օրերի մամուլի էջերից: Ձեռնարկն աւարտւեց ընդունելութեամբ: