Հ. Մ. «Արարատ» կազմակերպութեան աղջ. բասկետբոլի խումբը Իրանի ներկայացուցիչն է Արբիլում կայանալիք մրցաշարում

Իրանի աղջկանց բարձրագոյն լիգայի մրցութիւններում Հ. Մ. «Արարատ» կազմակերպութեան աղջկանց բասկետբոլի խմբի յաղթանակի եւ Իրաքի Արբիլ քաղաքում կայանալիք արեւելեան Ասիայի գաւաթի խաղերին որպէս Իրանի ներկայացուցիչ մասնակցելու առիթով երէկ «Արարատ» մարզաւանում տեղի ունեցաւ մամլոյ ասուլիս՝ «Հայ կանանց մարզանքի ընդլայնումը՝ ներկայ չափանիշերով» թեմայով: Մամլոյ ասուլիսին ներկայ էին՝ Հ.Մ.Ա.Կ.-ի Կենտրոնական վարչութեան փոխնախագահ Հարմիկ Զովէլեանը, Իրանի բասկետբոլի ֆեդերացիայի քարտուղար Համիդ Խոմջանին, Իրանի կանանց բասկետբոլի ֆեդերացիայի փոխնախագահ Ֆաթեմէ Քարամզադէն, կանանց բասկետբոլի ֆեդերացիայի քարտուղար եւ Հ.Մ.Ա.Կ.-ի աղջկանց բասկետբոլի խմբի պատասխանատու Օդետ Աղաջանեանը, Իրանի մինիբասկետբոլի ազգային հաւաքականի պատասխանատու եւ Հ.Մ.Ա.Կ.-ի մինիբասկետբոլի պատանեկան խմբի նախագահ Ժոզէֆ Նազարեանը եւ Հ.Մ.Ա.Կ.-ի Մարզական միութեան վարչութեան նախագահ Արբի Սարգսեանը: Ասուլիսի ընթացքում խօսւեց «Արարատ»-ի աղջկանց եւ տղայոց բասկետբոլի խմբերի կարգավիճակի, աղջկանց բասկետբոլի խմբի յաջողութիւնների եւ յուլիսի 5-ին Իրաքի Արբիլում կայանալիք խաղերին Իրանի ներկայացուցիչ «Արարատ» խմբի նախապատրաստական աշխատանքների մասին: Ասուլիսի ընթացքում Իրանի բասկետբոլի ֆեդերացիայի ներկայացուցիչները կարեւորութեամբ անդրադարձան այն խնդրին, որ «Արարատ»-ի աղջկանց բասկետբոլի խումբը միշտ եղել է կարգապահ եւ յաղթանակ ձեռք բերելու համար շատ լաւ դրդապատճառով հանդէս եկել, ուստի՝ արժանի տեղ է զբաղեցրել: