«ԸՆՏՐԱԿԱՆ ՑԱՆԿ» ԱՍԱՑՒԱԾՔԸ…

Ոչ շատ կուրախանանք նրանց ընտրւելով ու ոչ էլ շատ կը տխրենք դրանց չընտրւելով, այլ կուրախանանք այն ժամանակ երբ Պատգամաւորական Ժողով մուտք կը գործեն ժողովրդի ընտրեալները

Վերջին օրերի ընթացքում, երբ մեր գրութիւնների առանցքը առաւելաբար կազմում էր Պատգամաւորական Ժողովի ընտրութիւնները, յարգելի այցելուներն իրենց թողած պատգամներում տարբեր տեսակէտներ յայտնեցին մեր կողմից ընտրական ցանկ հրապարակելու մասին:
Թէեւ «Ընտրական Ցանկ» ասացւածքը աւանդաբար քաղաքական ասոյթ - տերմին է, որոնք հրապարակւում են քաղաքական կուսակցութիւնների կողմից, բայց դա չի խանգարում մեր որոշումը գործադրելու համար այն մասին, թէ ո՞ր թեկնածուներին ենք հովանաւորում: Աւելի ճիշտն ասելու համար այսպէս շտկենք մեր նպատակը, որ մեր կայքէջը իր առաքելութեան ծիրի մէջ, քննելով թեկնածուների հրապարակւած անուններն ու ցանկերը, պարզապէս մի շարք անունների առջեւ թիք նշան ենք դրել, եւ կամ աստղանիշով մեր յիշողութեան ենք յանձնել այն անունները, որոնց պիտի քւէարկենք ուրբաթ նոյեմբերի 21-ին, Թ.Հ.Թ. Պատգամաւորական Ժողովի 14-րդ շրջանի ընտրութիւններում:
Այցելուներից ոմանք, յորդորել են որ «չմտնել այս կեղտոտ խաղ»ի մէջ... (ասել է թեկնածուներից մէկը): Ոմանք յարմար չեն նկատել որ «Իրանահայեր» -ը որպէս անկախ լրատւամիջոց կողմնորոշում ունենայ այս ընտրութիւններում: Իսկ ինչպէս այցելուներն իրենք եւս նկատել են, մեծ տոկոս կազմող հայրենակիցներ, իրենց պատգամներով ցանկացել են իմանալ թէ մենք ի՞նչ ցանկի կամ անհատների ենք քւէարկելու: Ոմանք էլ ընտրութիւններին չմասնակցելու, եւ կամ սպիտակ թերթիկ քւէարկելու առաջարկ են ներկայացրել:
Շնորհակալութիւն յայտնելով մեր բոլոր այցելուներին, որոնք իրենց ցուցմունքներով ու խորհուրդներով օգնեցին մեզ այս զգայուն հարցում ճիշտ ու արդար դիրքորոշում ունենլու համար, նախ պիտի հետեւեալ յստակեցումները կատարել.-

1. Մենք ոչ միայն բոյկոտի չենք ենթարկում ընտրութիւնները, այլ բոլոր հայրենակիցներին ու մեր մնայուն այցելուներին հրաւիրում ենք աշխոյժ ու գիտակից մասնակցութիւն ունենան ընտրութիւններին:

2. Ճերմակ թերթիկ քւէարկելը այս պայմաններում, երբ վճռակամօրէն ցանկանում ենք ինչ որ բարեփոխումներ կատարել, ոչ միայն բողոքի դրսեւորում չի համարւում, այլ պատճառ է դառնալու որ ընտրւող պատգամաւորները ժողովրդական նւազ հովանաւորութիւնը վայելելով օրէնսդիր մարմին մուտք գործեն: Այս դէպքում ոչ միայն բողոքն իր նպատակին չի ծառայելու, այլ մենք, մեր ձեռքով նւազեցնում ենք ընտրւող պատգամաւորների թէ՝ ինքնավստահութիւնը եւ թէ օրէնսդրութեան ուժականութիւնը:

3. Յարգելով մեր բոլոր այցելուների տեսակէտները, որոնք յայտնել են թողած պատգամների միջոցով, պիտի ճշմարտութեամբ յայտնել, որ ընդհանրապէս աշխարհում գոյութիւն չունի անկախ լրատւամիջոց եւ կամ զանգւածային հրապարակում: Ճիշտ այնպէս, որ գոյութիւն չունի անկախ թեկնածուների ցանկ:
Հրատարակութիւններն ու հրապարակումները, դրանք լինեն պետական կամ սեփական բաժնի կողմից հրապարակւող մամուլ, ռադիո-հեռուստատեսութիւն, արբանեակային ու ինտերնետային ցանցեր եւ նոյնիսկ ներքին բուլիտաններ եւ... չեն կարող ինքընիստինքեան եւ ինքնանպատակ լինել: Դրանք հրապարակւում են ինչ որ խօսք, պատգամ, ճաշակ, եւ բազմաթիւ գաղափարներ ու ցանկութիւններ հրամցնելու համար հասարակութիւններին:
Բայց այս չի նշանակում, որ իւրաքանչիւր հրապարակում ու հրատարակութիւն պիտի անպայման քաղաքական կողմնորոշում ունենայ: Բազմաթիւ են մասնագիտական հրատարակութիւնները, որոնք առանց քաղաքական դիրքորոշման բնապահպանում են քարոզում, առողջութեան գաղտնիքներն են ներկայացնում, որսորդութեան, տան ներքին յարդարման ու... բազմաթիւ թեքումներով հրատարակութիւններ կան հասարակութիւններում: Բայց դրանցից ոչ մէկը ո՛չ անկախ են, եւ ո՛չ էլ ինքնանպատակ: Դրանք բոլորն էլ ունեն իրենց նախապէս ճշտւած քաղաքականութիւնն ու թեքումը, որը ենթակայ է ինչ որ յանձնառութիւն վերցրած կառոյցի. օրինակ բնապահպանման կողմնակիցների ոչ պետական միութեան: Այդ պատճառով է, որ այդպիսի քաղաքականութիւն որդեգրած թերթ կամ որեւէ մեդիա չի կարող ծառերի հատման ձեւեր քարոզի:

4.- «Իրանահայեր» լրատու կայքէջն էլ, այդ բոլորի նման ոչ անկախ է, եւ ոչ էլ ինքնանպատակ: Անկախ չենք այդ հասկացողութեամբ, որ յանձնառութիւն ու պատասխանատւութիւն ենք զգում մեր պաշտած գաղափարախօսութեան՝ Հայ Յեղափոխական Դաշնակցութեան նկատմամբ, որը գաղտնի չի ոչ մի այցելուից: Բայց այդ պատճառ չի դառնում որ չհետաքրքրւենք մեր հասարակութեան ու համայնքի վիճակից: Գուցէ հէնց այդ գաղափարաբանութիւնն է մեզ մղում որ այդպէս լինել, բայց համենայն դէպս յանձնառու ենք եւ չենք կարող ինքնանպատակ լինել եւ անտարբեր մնալ մեր շրջապատի նկատմամբ:

Այդ իսկ պատճառով է, որ ընդառաջելով մեր այցելուների պահանջներին ներկայացնում ենք նրանց, որոնց պիտի մենք քւէարկենք: Անշուշտ բոլորովին չենք ուզում այս համարել ընտրական ցանկ եւ կամ որեւէ անուն, որին կոչում են ոմանք: Ոչ շատ կուրախանանք նրանց ընտրւելով ու ոչ էլ շատ կը տխրենք դրանց չընտրւելով, այլ կուրախանանքայն այն ժամանակ երբ Պատգամաւորական Ժողով մուտք կը գործեն ժողովրդի ընտրեալները:
Մինչեւ այդ, տեղեկացնենք, որ անունները հրապարակելու ենք վաղը, այսու բոլոր թեկնածուներից խնդրում ենք, նրանք որոնք չեն ցանկանում լինեն մեր կողմից հրապարակւող ցանկի վրայ, մինչեւ այս գիշեր (նոյեմբեր 18) ժամը 22 (10pm) մեզ տեղեկացնեն մեր կայքէջի էլեկտրոնային փոստի եւ կամ 0919.371.2976 հեռախօսահամարի միջոցով:
Մնացէք մեզ հետ:

«ԻՐԱՆԱՀԱՅԵՐ» Լրատու Ցանցի Խմբագրութիւն