Սեյրան Օհանյանին հրավիրել են Իրան

ՀՀ պաշտպանության նախարար Սեյրան Օհանյանն ընդունել է Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան, պարոն Սայեդ Ալի Սաղայիանին:

Ըստ պաշտպանության նախարարի մամլո քարտուղարի, Ս. Օհանյանը շնորհավորել է դեսպանին Իրանում կայացած նախագահական ընտրություններում պարոն Մահմուդ Ահմադինեժադի վերընտրվելու կապակցությամբ և հույս հայտնել, որ հայ-իրանական երկկողմ հարաբերությունները կամրապնդվեն և կթևակոխեն զարգացման որակական նոր փուլ: Հանդիպման ընթացքում կողմերը վերահաստատել են Հայաստանի և Իրանի դիրքորոշումները տարածաշրջանային և երկկողմ համագործակցության խնդիրներում, մտքեր են փոխանակել տարածաշրջանային անվտանգությանն ու կայունությանն առնչվող մի շարք հարցերի շուրջ:

Սայեդ Ալի Սաղայիանը ՀՀ պաշտպանության նախարարին փոխանցել է Իրանի պաշտպանության նախարար, գեներալ-մայոր Մոհամմադ Նաջարի` Իրան այցելելու հրավերը: