Հայաստանի երկրորդ նախագահի հանդիպումները Իրանի բարձրագույն ղեկավարության հետ

Հայաստանի նախկին նախագահ Ռոբերտ Քոչարյանը նախօրեին հանդիպումներ է ունեցել Իրանի բարձրագույն ղեկավարության հետ: Նա նա հանդիպել է Իրանի արտգործնախարար Մանուչեիր Մոթաքիի հետ, այնուհետև հանդիպել է Իրանի նախագահ Մահմուդ Ահմադինեժադի հետ: Այդ մասին տեղեկացրել են իրանական լրատվամիջոցները: Մասնավորապես, Իրանի արտաքին քաղաքական գերատեսչության ղեկավարի հետ հանդիպման ժամանակ նրանք խոսել են տարածաշրջանային անվտանգության ու կայունության ապահովման մասին : Մոթաքին բարձր է գնահատել Իրանի և Հայաստանի դարավոր հարաբերություններն ու ընդգծել է Կովկասում խաղաղություն հաստատելու կարևորությունը:

Իսկ Քոչարյանն էլ իր հերթին ընդգծել է Իրանի և Հայաստանի հարաբերությունները` նշելով, որ «հայկական կողմը ամեն ջանք կգործադրի Իրանի հետ հարաբերություններն ընդլայնելու համար»:

«Նրանք, ովքեր դավեր են նյութում մեր դեմ, շատ թույլ են, և հզոր երկրները արդարության իրենց ձգտման մեջ գտնվում են ուղիղ ճանապարհի վրա, ինչը որոշվում է երկկողմ հարաբերությունների համագործակցության մակարդակի բարձրացմամբ»,- ասել է նախագահ Ահմադինեջադը Քոչարյանի հետ հանդիպման ժամանակ: Ահմադինեջադը նաև ասել է, որ Հայաստանի հետ Իրանին կապում է դարավոր բարեկամությունը և որ կողմերը լի են վճռականությամբ համագործակցել բազում ծրագրեր իրականացնելու հարցում:

Իրանական IRNA գործակալության տվյալներով, Քոչարյանն իր հերթին նկատել է, որ իր երկիրը պատրաստ է ընդլայնել իր կապերը Իրանի Իսլամական Հանրապետության հետ և ընդգծել է, որ կողմերը լի են վճռականությամբ տարածաշրջանային համագործակցության մակարդակը բարձրացնելու համար:

Նախկին նախագահի մամլո խոսնակ Վիկտոր Սողոմոնյանը Panorama.m-ին փոխանցեց, որ Քոչարյանի այցելության մասին տեղեկություններ կտարածի այսօր` մինչև օրվա վերջ:

Հատկանշական է, որ իրանական գործակալություններում հրապարակված այս տեղեկություններին ուղեկցող լուսանկարներում երկու հանդիպումների ժամանակ էլ Հայաստանի պետական դրոշը բացակայել է, այն դեպքում, երբ առկա է եղել Իրանի պետական դրոշը: 

Է. Նալբանդյանը Ռ. Քոչարյանի Իրան կատարած այցելության մեջ արտառոց ոչինչ չի տեսնում
Հայաստանի երկրորդ նախագահ Ռոբերտ Քոչարյանի այցը Իրան եղել է մասնավոր բնույթի և Իրանի ղեկավարության հրավերով: Այսօրվա ասուլիսում, ի պատասախան լրագրողներից մեկի հարցին, ասաց Հայաստանի արտգործնախարար Էդվարդ Նալբանդյանը:

Քոչարյանի Իրան կատարած այցելության մեջ նա արտառոց ոչինչ չի տեսնում:
Լրագրողներից մեկի այն դիտարկմանը, թե այն, որ Հայաստանի երկրորդ նախագահը ասել է`  Հայաստանը կողմ է Իրանի հետ հարաբերությունների ընդլայնմանը, նշանակում է` Քոչարյանը հանդես է եկել Հայաստանի անունից, ԱԳ նախարարը արձագանքեց

 «Դա որևէ մեկի համար գաղտնիք չէ, որ Հայաստանը կողմ է Իրանի հետ հարաբերությունների ընդլայնմանը; Այդ հարցը ՀՀ երկրորդ նախագահի ղեկավարության օրոք ընդգրկված է եղել արտաքին քաղաքականության օրակարգում:

Նա նաև հայտարարեց, որ հունվարի 26-ին Իրանի ԱԳ նախարար Մանուչեիր Մոթաքքին ժամանելու է Հայաստան: