Նալբանդյան-Բրայան հանդիպմանը քննարկվել են արցախյան հիմնախնդրի հետ կապված հարցեր

Աշխատանքային այցով Լոնդոնում գտնվող արտգործնախարար Էդվարդ Նալբանդյանը հանդիպել է Միացյալ Թագավորության Եվրոպական հարցերով պետնախարար Քրիս Բրայանի հետ: ԱԳՆ մամուլի և տեղեկատվության վարչության տեղեկացմամբ, հանդիպմանը քննարկվել են երկկողմ, տարածաշրջանային և միջազգային մի շարք հարցեր, Հայաստան-Եվրոպական Միություն համագործակցությունը: 

Զրուցակիցներն ընդգծել են բարձրաստիճան այցելությունների կարևորությունը երկկողմ համագործակցության խթանման համար: 

Նրանք գոհունակություն են հայտնել երկու երկրների արտաքին քաղաքական գերատեսչությունների միջև պարբերական քաղաքական խորհրդատվությունների անցկացման առնչությամբ, մտքեր են փոխանակել իրավապայմանագրային դաշտի ընդլայնման վերաբերյալ: 

Էդվարդ Նալբանդյանն ու Քրիս Բրայանն անդրադարձել են նաև արցախյան հիմնախնդրի կարգավորման բանակցային գործընթացի վերջին զարգացումներին, Հյուսիսային Իռլանդիայում ընթացող գործընթացներին: 

Նախարարներն արծարծել են նաև հայ-թուրքական հարաբերությունների կարգավորման գործընթացին վերաբերող հարցեր: Նախարար Բրայանը ողջունել է Հայաստանի և Թուրքիայի միջև հարաբերությունների հաստատմանն ուղղված ջանքերը: