Պատգամաւորական Ժողովն Այսօրւայ Ամենակենսական Հարցն Է

(Առաջին Մաս)

Գամեր Գասպարեան 

Ճիշտ մէկ շաբաթ յետոյ, այսինքն ուրբաթ, նոյեմբերի 21-ին (Ազար-1) Թեհրանի հայոց թեմի բոլոր շրջաններում տեղի են ունենալու թեմի 14-րդ շրջանի Պատգամաւորական Ժողովի ընտրութիւնները:
Դա լինելով թեմի օրէնսդիր ամենաբարձրագոյն մարմինը, եւ ընտրութիւնները տեղի ունենալով համայնքի ամենազգայուն ու նուրբ ժամանակաշրջանում, ունենում է չափազանց յոյժ կարեւորութիւն ու նոյնիսկ ճակատագրական նշանակութիւն: Անտարակոյոս այս ընտրութեան կարեւորութիւնն ու ճակատագրական նշանակութիւնը այն դէպքում է իմաստաւորւում, երբ Ժողովն ու Ժողովականները լինեն իրենց իսկական ու օրինական դիրքի մէջ, եւ ոչ թէ դառնալով իրենից աւելի ստորադաս մարմինների թելադրանքների գործադրողները, եւ կամ ապօրինի ու համայնքի հաւաքական շահերը վտանգող պարտադրական որոշումների օրինականացնողը:
Ճիշտ այնպէս, որ 13-րդ Պատգամաւորական Ժողովն իր վերջին նիստում հաստատեց այնքան կարեւոր ու ազգային հաւաքական արժէքների մարտավարական նշանակութիւն ունեցող «Արամ Մանուկեան» Ազգային Սրահի վաճառման որոշումը, ահա 14-րդ Ժողովը կարող է ոչ միայն փոխարինել անցեալ շրջանի թերութիւնները, այլ պիտի իր օրինական եւ իրաւացի հիմքերն ամրապնդելով ազգային իշխանութեան վարչական կառոյցի մէջ վերահսկի բոլոր այն գործընթացները, որոնք ազգային իշխանութիւնը կատարում եւ կամ կատարելու ընթացքում է:
Անշուշտ ժողովրդի դերակատարութիւնն այսպիսի օրինական կառոյց ունենալու եւ կազմաւորելու համար չափազանց կարեւոր ու նշանակալից է: Ժողովուրդը ճիշտ ընտրութիւն կատարելով նախ իր ազգային ու հրամայական պարտաւորութիւնն է կատարում, եւ ապա նոյն ժողովուրդն է, որ պիտի կառչած մնայ իր վերահսկողութեան դերակատարութեան սկզբունքին:
Այսպիսով ժողովրդի պարտաւորութիւնները չի աւարտւում միայն պատգամաւոր ընտրելով, այլ դա շարունակւում է Պատգամաւորական Ժողովի վերահսկողութեամբ, որի ձեւերն սահմանները ճշտի ինքը՝ Պատգամաւորական Ժողովը, որի իրաւունքների ու պարտաւորութիւնների սահմանների մէջ է:
Մենք այսօր այսքանով բաւարարւեցինք, սակայն պիտի փորձենք ամէն օր ինչ որ ձեւով լուսաբանական տեղեկութիւններ փոխանցենք մեր այցելուներին՝ Ժողովի եւ Ժողովրդի իրաւունքների ու պարտականութիւնների մասին:
Անշուշտ վերջում կառաջարկենք նաեւ այն թեկնածուներին, որոնք մեր տեսակէտով կարող են վերականգնել Պատգամաւորական Ժողովի իրական դերն ու նշանակութիւնը համայնքի մէջ:
Անցեալի նման սպասում ենք նաեւ Ձեր տեսակէտներին:
Մնացէք մեր հետ: